Био-библиографски белешки за членовите
Милан Ѓурчинов
есеист, критичар, книжевен историчар и теоретичар, антологичар. Роден е во Белград на 28 јуни 1928 година. Завршил Филолошки факултет во Белград. Доктор по филолошки науки. Бил професор на Филолошкиот факултет во Скопје, бил шеф на катедрата за славистика и покренувач и раководител на катедрата за компаративна книжевност. Бил член на редакцијата на списанието „Разгледи“. Бил претседател на Советот на СВП. Член на Македонската академија на науките и уметностите од 1988 година. Член на ДПМ од 1956 година. Бил претседател на Друштвото на писателите на Македонија. Автор е на книгите: Време и израз (1956), Присутности (1963), Македонски писатели (1969), Живо и мртво (1974), Критички сведоштва (1976), Достоевски (1981), Современа македонска книжевност(1984), Проникнувања (1986), Пастернак (1987), Марксизам творештво вредности (1988), Пред прагот на иднината (1991), Заговорници на човечноста (1992), Нова македонска книжевност (1996), Сребрени соништа - Ацо Караманов (1997), Компаративни студии (1998), Освојување на реалноста (2000). Составувач на антологии на македонската проза и поезија на италијански, француски, српски, турски и др. јазици. Добитник на наградите: „11 Октомври“, „Димитар Митрев“, „Златен прстен“.
